Ngjarja e rëndë ka ndodhur më 14 qershor 2026, rreth orës 11:50, në fshatin Kobaj të komunës së Prizrenit. Pas një përleshjeje fizike, një viktimë mashkull kosovar është goditur me mjet të mprehtë, thikë, duke gjetur vdekjen si pasojë e plagëve të marra. Në të njëjtin incident, një tjetër person ka pësuar lëndime trupore dhe po merr trajtim mjekësor.
Sipas raportit zyrtar të Policisë së Kosovës, për këtë rast janë arrestuar tre persona, dy burra dhe një grua, të gjithë shtetas të Republikës së Kosovës. Të dyshuarit, pas pranimit të tretmanit mjekësor dhe intervistimit nga organet e rendit, janë dërguar në mbajtje me vendim të prokurorit. Rasti është iniciuar si Vrasje e rëndë dhe Shtytje në vrasje.
Trupi i pajetë i viktimës është dërguar në Institutin e Mjekësisë Ligjore (IML) për t'iu nënshtruar obduksionit. Hetimet po zhvillohen për të zbardhur rrethanat dhe motivet e konfliktit, i cili dyshohet se ka ndodhur mes palëve që janë kushërinj të njëri-tjetrit.