Policia e Kosovës në Prizren ka arrestuar tre të dyshuar për një grabitje të armatosur të ndodhur më 3 shkurt 2026, rreth orës 01:10. Dy viktima, një mashkull dhe një femër, kanë deklaruar se tre persona të maskuar dhe të armatosur me thikë dhe pistoleta i kanë kanosur dhe u kanë marrë një shumë parash që kishin me vete.
Pas hetimeve intensive, policia ka identifikuar katër të dyshuar. I dyshuari i parë u arrestua pranë një lokali në Prizren, ku gjatë kontrollit iu gjet një armë në trup, ndërsa në automjetin e tij u sekuestruan një armë tjetër, dy maska, doreza dhe rroba që dyshohen se u përdorën gjatë grabitjes. Me një operacion të koordinuar, u arrestuan edhe dy të dyshuar të tjerë në një lokacion tjetër në Prizren.
Me urdhër të prokurores së rastit, u kryen bastisje në shtëpinë e njërit prej të dyshuarve dhe në një lokal, ku u siguruan prova shtesë. Dy nga të dyshuarit, në prani të avokatëve mbrojtës, pranuan kryerjen e veprës penale.
Me vendim të prokurorit kujdestar, tre të dyshuarit K.K. (20 vjeç), Sh.G. (20 vjeç) dhe L.G. (36 vjeç) u ndaluan për 48 orë. I dyshuari i katërt, V.S., nuk u gjet në shtëpi dhe ndodhet në arrati.
Rasti hetohet nga Sektori Rajonal i Hetimeve – Prizren, në bashkëpunim me Prokurorinë e Shtetit.