Një 49-vjeçar, i lindur më 1977, mbeti i vrarë në fshatin Bokshiq të Klinës në Kosovë. Prokuroria Themelore në Pejë dhe Policia e Kosovës njoftuan se ngjarja ndodhi rreth orës 15:00.
Policia mbërriti menjëherë në vendngjarje dhe zbuloi se viktima ishte plagosur me armë zjarri. Ajo u dërgua në Spitalin Rajonal të Pejës për trajtim, por arriti pa shenja jete rreth orës 15:30. Mjeku kujdestar konfirmoi vdekjen për shkak të plagëve të rënda.
Autori i dyshuar, vëllai i viktimës, u arrestua në vendngjarje. Ai u vendos në ndalim 48-orësh nën dyshimet për veprën penale vrasje e rëndë. Paraprakisht, policia tha se vrasja pasoi një sherr mes tyre në familje.
Autoritetet sekuestruan një armë zjarri, që dyshohet se u përdor në ngjarje, si dhe prova të tjera materiale.
Kjo është vrasja e dytë brenda kësaj jave në Kosovë. Në fillim të javës, një person u vra dhe një tjetër u plagos në Gjakovë, ndërsa i dyshuari u vetëdorëzua disa orë më vonë në polici.
Viteve të fundit, në Kosovë janë regjistruar një sërë rastesh të dhunës me armë zjarri që kanë çuar në vrasje. Mijëra armë zjarri pa leje llogariten të jenë në duart e qytetarëve, dhe ekspertët kërkojnë konfiskimin e tyre për të ulur incidentet e tilla.