Një person humbi jetën sot në fshatin Bokshiq të komunës Klinë, pas të shtënave me armë zjarri të raportuara rreth orës 15:08. Prokuroria Themelore në Pejë dhe Drejtoria Rajonale e Policisë në Pejë konfirmuan se Policia mbërriti menjëherë në vendngjarje dhe gjeti një person të plagosur.
Viktima u dërgua në Spitalin Rajonal të Pejës për trajtim mjekësor, por ndërroi jetë si pasojë e plagëve të rënda. Vdekjen e konstaton mjeku kujdestar i spitalit. Trupi i pajetë dërgohet në Institutin e Mjekësisë Ligjore për obduksion, me urdhër të Prokurorit të Shtetit.
Policia arrestoi në vendngjarje personin e dyshuar, i cili u ndalua për 48 orë për veprën penale Vrasje e Rëndë. Burime paraprakisht e identifikojnë atë si vëllain e viktimës. Është sekuestruar arma e dyshuar, tri gëzhoja si dhe prova të tjera relevante nga njësitë policore dhe Prokurori i Departamentit të Krimeve të Rënda.
Prokuroria Themelore në Pejë do të parashtrojë kërkesë për caktimin e masës së paraburgimit në Gjykatën Themelore të Pejës, Departamenti i Krimeve të Rënda. Hetimet vijojnë në koordinim me Hetimet Rajonale të Policisë.
Zëdhënësi i policisë rajonale, Fadil Gashi, dhe zëdhënësi i Prokurorisë, Shkodran Nikçi, konfirmuan sekuestrimin e armës dhe gëzhojave.
Përditësime
Policia ka konfirmuar se vrasja në Bokshiq të Klinës ka ndodhur pas një sherri familjar mes vëllezërve.
Spitali Rajonal i Pejës ka njoftuar se viktima ka mbërritur rreth orës 15:30 pa shenja jete.
Kjo është vrasja e dytë brenda kësaj jave në Kosovë, pas asaj në Gjakovë.
Faruk Isufi u identifikua si viktima e vrasjes në Bokshiq të Klinës.
Vëllezërit kishin mosmarrëveshje për linjat e autobusëve dhe pronën; ata nuk flisnin prej 3 vitesh.
Shkodran Nikçi deklaroi për T7 se nuk ka evidencë penale kundër viktimës apo të dyshuarit:
"Nuk ka evidencë penale kundër Faruk Isufit apo të dyshuarit. Mosmarrëveshjet ishin familjare për linja autobusësh dhe prona."
Sherri filloi në oborrin e shtëpisë ku viktima po punonte. Viktima u përpoq ta shmangë vëllain me mjetin e punës. I dyshuari hyri në shtëpi, mori armën dhe qëlloi disa herë.
Prokuroria Themelore e Pejës ka parashtruar kërkesë për caktimin e paraburgimit ndaj të dyshuarit. Seanca paraprake pritet të mbahet sot pasdite, sipas zëdhënësit Shkodran Niçki.