5 Maji: Nderohen 231 Dëshmorët e Policisë në Akademinë e Sigurisë

Në 5 maj, në Akademinë e Sigurisë, u zhvillua ceremonia për Ditën e Dëshmorëve të Policisë së Shtetit dhe të Atdheut. Morën pjesë përfaqësues të Ministrisë së Punëve të Brendshme dhe institucioneve në varësi të saj, drejtues të lartë të Policisë së Shtetit, përfaqësues të misioneve ndihmuese, si dhe familjarë dhe të afërm të punonjësve të rënë në krye të detyrës.

Të pranishmit nderuan veprën dhe kujtimin e 231 Dëshmorëve të Policisë, emrat e të cilëve janë gdhendur në memorialin e posaçëm. Gjatë ceremonisë u mbajtën fjalë për rastin, në shenjë vlerësimi për aktin e tyre sublim.

Drejtori i Përgjithshëm i Policisë së Shtetit, Drejtues Madhor Skënder Hita, në fjalën e tij deklaroi: “5 Maji është një ditë kur uniforma nuk shihet vetëm si detyrë, por si betim, si një vijë e padukshme mes jetës së zakonshme dhe sakrificës së jashtëzakonshme. Për çdo punonjës policie, kjo ditë është edhe pasqyrë, edhe thirrje. Pasqyrë për të parë se çfarë peshe ka uniforma që mbajmë. Dëshmorët tanë na mësojnë se uniforma nuk nderohet nga grada, por nga karakteri. Nuk ndriçon nga metali i stemës, por nga morali i njeriut që e mban. Në emër të Policisë së Shtetit, sot shpreh përuljen më të thellë për të gjithë punonjësit e Policisë që dhanë jetën në krye të detyrës. Për ata që u nisën në mëngjes me uniformë dhe nuk patën kohë të thoshin lamtumirë, por u kthyen në përjetësi me flamur, duke lënë pas një mesazh që nuk shuhet, se detyra kur vishet me ndershmëri, bëhet më e madhe se jeta.”

Zëvendësministrja e Punëve të Brendshme Anisa Ruseti theksoi: “Është në nderin dhe detyrimin tonë moral të kujtojmë me respekt të thellë sakrificën e punonjësve të Policisë së Shtetit që kanë dhënë jetën në krye të detyrës, për të mbrojtur jetën, rendin dhe sigurinë e qytetarëve tanë. Ata janë heronj që flijuan vetveten për idealin më të lartë, për këtë flamur, për Shqipërinë.”