Në Varrezat e Dëshmorëve të Atdheut u zhvillua ceremonia e rivarrimit të Dëshmorit të Atdheut Novruz Cenalia. Efektivi i Policisë së Shtetit u vra dy vite më parë gjatë kryerjes së detyrës në Fier.
Në ceremoni morën pjesë Drejtori i Përgjithshëm i Policisë së Shtetit Skënder Hita, Ministri i Punëve të Brendshme Besfort Lamallari, familjarë të dëshmorit, drejtues të policisë dhe qytetarë.
Hita theksoi se sakrifica e Cenalias është një kujtesë e gjallë dhe një betim për shoqërinë. Ai deklaroi se çdo dorë e ngritur mbi uniformën e policisë godet themelet e shtetit dhe do të përballet me forcën e ligjit.
Ministri Lamallari vlerësoi aktin e shpalljes së Cenalias si Dëshmor të Atdheut dhe kërkoi që drejtësia të shkojë deri në fund të ngjarjes. Ai tha se humbja e efektivit forcon vendosmërinë e institucioneve për të luftuar krimin.
Ceremonia shërbeu si moment nderimi për sakrificën e punonjësve të policisë që kryejnë detyrën në mbrojtje të rendit dhe sigurisë publike.