Një sondazh i Komisionit Evropian zbulon se 68% e evropianëve mendojnë se vendet e tyre janë nën kërcënim, ndërsa 42% e konsiderojnë të rrezikuar sigurinë personale. Flash Eurobarometer 574 u krye online nga kompania Demoscopy me seli në Bruksel midis 5 dhe 12 janarit me rreth 27.000 të anketuar në 27 shtetet anëtare të Bashkimit Evropian, përpara Konferencës së Sigurisë në Mynih.
Perceptimi më i lartë i kërcënimit u regjistrua në Francë me 80%, e ndjekur nga Hollanda dhe Danimarka me 77% si dhe Gjermania me 75%.
Sa i përket investimeve në mbrojtje, 32% e të anketuarve vlerësojnë se Bashkimi Evropian nuk ka ndërmarrë hapa të mjaftueshëm, ndërsa 34% thonë se vendet e tyre kanë dështuar në këtë drejtim.
Megjithatë, 52% i besojnë BE-së për të forcuar sigurinë dhe mbrojtjen. Besimi më i lartë u shënua në Luksemburg me 76%, Portugali me 74% dhe Lituani me 71%. Ky tregues është më i ulët në Itali, Gjermani dhe Francë, ku 47% e gjermanëve dhe italianëve si dhe 40% e francezëve nuk pajtohen.
Pothuajse tre të katërtat e të anketuarve mbështesin investimet aktuale të BE-së në mbrojtje ose kërkojnë rritjen e tyre:
• Portugali 89%
• Finlandë 83%
• Lituani dhe Spanja 80%
• Danimarkë 78%