Sipas raportit të fundit të Eurostat mbi vlerësimin e të dhënave dhe përmbajtjes digjitale, Shqipëria renditet ndër vendet me përqindjen më të ulët në Europë për sa i përket verifikimit të vërtetësisë së informacionit online. Shifra prej 14.34% e vendos Shqipërinë në vendin e tretë nga fundit, duke u kapërcyer vetëm nga Greqia me 9.78% dhe Serbia me 11.13%.
Në nivel rajonal, individët në Maqedoninë e Veriut shfaqin një qasje më aktive me 24.22%, ndërsa në Malin e Zi kjo shifër është 21.43%. Përkundër këtyre vlerave, në vendet e Bashkimit Europian mesatarja e verifikimit të informacionit është 29.16%, ku Irlanda kryeson tabelën me 63.64%, e ndjekur nga Holanda me 53.06% dhe Luksemburgu me 45.24%.
Ky tregues, i matur nga Eurostat përmes anketës mbi përdorimin e teknologjive të informacionit dhe komunikimit, merr rëndësi të veçantë në kuadër të sfidave të sigurisë digjitale. Sipas Eurobarometrit të Komisionit Europian, 66% e qytetarëve europianë deklarojnë se përballen rregullisht me dezinformimin, ndërsa 82% e tyre vlerësojnë se informacioni i rremë që shtrembëron realitetin përbën një kërcënim për vlerat demokratike.