Sipas raportit Balkan Barometer 2025, të publikuar nga Këshilli i Bashkëpunimit Rajonal (RCC), siguria dhe mirëqenia e fëmijëve në internet është shqetësimi kryesor për të anketuarit në Shqipëri. Këtë e përmendin 50% e tyre, ose 7 pikë përqindjeje më shumë se mesatarja e Ballkanit Perëndimor, e cila është 43%.
Në vendin e dytë renditen krimet në internet, përfshirë vjedhjen e të dhënave personale dhe të informacionit të kartave bankare. Për këtë rrezik shprehen të shqetësuar 39% e shqiptarëve, krahasuar me 40% në nivel rajonal.
Siguria e pagesave online shqetëson 21% të të anketuarve në Shqipëri, ndërsa mesatarja rajonale është 26%. Mungesa e aftësive të nevojshme digjitale për të përdorur në mënyrë aktive teknologjinë shqetëson 13% të të anketuarve, njësoj sa mesatarja e Ballkanit Perëndimor.
Shqetësimi se përdorimi i inteligjencës artificiale mund të çojë në humbjen e vendeve të punës përmendet nga 6% e të anketuarve në Shqipëri. Në nivel rajonal, kjo përqindje është 8%.
Raporti tregon gjithashtu se 30% e të anketuarve në Shqipëri nuk shohin arsye për t’u shqetësuar nga shtimi i përdorimit të internetit dhe mjeteve digjitale. Kjo krahasohet me 22% në nivel rajonal. Shqipëria ka përqindjen më të lartë në Ballkanin Perëndimor të personave që japin këtë përgjigje.