Suela Bonjaku, drejtuese pranë Sektorit për Hetimin e Krimeve Kompjuterike, dha alarmin një javë më parë për rritje të formave dhe intensitetit të krimeve kibernetike ndaj të miturve në Shqipëri. Kjo deklaratë u bë gjatë një takimi të grupit të punës për Kapitullin 24 – Drejtësia, Liria, Siguria, në kuadër të Konventës Kombëtare për Integrimin Europian.
Bonjaku theksoi se spektri i abuzimeve kibernetike shkon nga bullizmi deri te format më të rënda të abuzimit. "Shantazhi nëpërmjet materialeve intime është një nga format më të dhunshme të krimit kibernetik", shtoi ajo.
Sipas ekspertëve të shëndetit mendor, këto krime i ekspozon të miturit ndaj përvojave negative me efekte të thella dhe afatgjata në jetën e viktimave. Këto efekte kërkojnë reagim dhe mbështetje të koordinuar nga familja dhe shoqëria.
Trendi konfirmohet nga platformat monitoruese të shoqërisë civile. Linja Kombëtare e Këshillimit Telefonik për Fëmijë (ALO 116 111) ka trajtuar mbi 500 raportime të lidhura drejtpërdrejt me sigurinë e fëmijëve në internet gjatë pesë viteve të fundit. Vetëm në vitin 2025 janë regjistruar 127 raste të dhunës online.
Klaudio Pulaha, punonjës social i kësaj linje, shpjegoi se shifrat tregojnë rritje të raportimeve dhe përkeqësim të ndikimit të mjedisit digjital te fëmijët. "Raportimet që vijnë nga fëmijët dhe adoleshentët lidhur me abuzimet digjitale janë thellësisht shqetësuese dhe përbëjnë një sinjal të fortë alarmi për mirëqenien e tyre psiko-emocionale", tha ai për BIRN.
Pulaha nënvizoi se gjatë tre viteve të fundit, pesë adoleshentë në Shqipëri kanë humbur jetën si pasojë e konflikteve të gjeneruara nga ndërveprimet në rrjetet sociale.
Me rritjen e rasteve, drafti i ri i Kodi Penal të Republikës së Shqipërisë përfshin kategori të reja veprash penale për krime kibernetike.