72 tigra kanë ngordhur javët e fundit në kopshtin zoologjik privat Tiger Kingdom në provincën Chiang Mai të Tajlandës veriore. Kafshët u infektuan me një virus shumë ngjitës të murtajës dhe infeksione bakteriale të rënda që dëmtojnë sistemin e frymëmarrjes, njoftojnë autoritetet lokale.
Departamenti i Blegtorisë së Kafshëve në Chiang Mai konfirmoi praninë e patogjenëve me teste laboratorike. Kopshti është një park turistik ku vizitorët mund të "përqafojnë, prekin dhe bëjnë foto nga afër me tigrat", sipas faqes së tij zyrtare. Menaxhmenti nuk ka dhënë ende koment.
Kreu i departamentit deklaroi se diagnostikimi i hershëm ishte i vështirë. "Kur tigrat sëmuren, është më e vështirë të zbulohen sesa tek kafshët si macet ose qentë. Kur kuptuam se ishin të sëmurë, ishte tashmë tepër vonë", tha ai për një agjenci lajmesh lokale.
Ngjarja ka nxitur reagime nga organizatat për mbrojtjen e kafshëve. PETA Asia deklaroi për AFP se "këta tigra ngordhën ashtu siç jetuan: në mjerim, robëri dhe frikë", duke rikthyer debatet mbi kushtet e mbajtjes së kafshëve të egra në ambiente turistike.
Autoritetet lokale kanë nisur hetime për të përcaktuar rrethanat e përhapjes së infeksionit dhe për të parandaluar raste të ngjashme.