Qeveria e Serbisë ka ndërmarrë masa emergjente pas shpërthimit të virusit të etheve afrikane të derrit në disa rajone të vendit. Gjendja e jashtëzakonshme është shtrirë në Rumë, Obrenovac, pjesë të Sremska Mitrovicës dhe Shabac, ndërsa raste të reja janë konstatuar pranë kufirit me Kroacinë në Bezdan, si dhe në qytetet Zhabal e Gospodinci.
Masat e autoriteteve
Ministri i Bujqësisë, Dragan Glamoçiq, ka bërë thirrje për respektim rigoroz të rregullave të biosigurisë, duke theksuar se hedhja e papërshtatshme e kafshëve të ngordhura do të ndëshkohet sipas ligjit. Autoritetet janë duke bashkëpunuar me Ministrinë e Punëve të Brendshme, Ushtrinë Serbe dhe shërbimet veterinare për të siguruar mbështetje logjistike dhe personelin e nevojshëm për kontrollin e situatës.
Sipas të dhënave zyrtare, niveli rekord i ulët i ujit në lumin Danub po lehtëson lëvizjen e derrave të egër, të cilët janë identifikuar si bartësit kryesorë të virusit së bashku me lëvizjet e njerëzve. Përveç asgjësimit të kafshëve të infektuara, disa pronarëve të fermave u është vendosur ndalesë e përkohshme për mbarështimin e derrave për një periudhë prej një muaji.