Lumir Abdixhiku, kryetar i Lidhjes Demokratike të Kosovës (LDK), zhvilloi një takim ndërpartiak me Albin Kurtin, kryetar të Lëvizjes Vetëvendosje (LVV) dhe kryeministër të Kosovës, në ambientet e Kuvendit të Republikës së Kosovës. Takimi u mbajt lidhur me procesin e zgjedhjes së Presidentit dhe stabilitetin institucional të vendit.
Abdixhiku theksoi se procesi po zhvillohet brenda një afati të kufizuar kohor. "Na kanë mbetur më pak se 9 ditë për të arritur një zgjidhje. Prandaj, në këtë kohë të shkurtër kërkohet përgjegjësi e lartë politike, e cila nënkupton qartësi, maturi dhe vullnet për kompromis, në mënyrë që të shmanget çdo rrezik për paqëndrueshmëri institucionale", deklaroi ai.
Ai nënvizoi rolin kushtetues të Presidencës. "Presidenca duhet të mbetet institucion që garanton ndarjen e pushteteve dhe shërben si faktor uniteti për vendin, e jo si vazhdim i shumicës qeverisëse", u shpreh Abdixhiku.
LDK vlerëson dy rrugë të qëndrueshme për tejkalimin e situatës:
- Një konsensus i gjerë parlamentar rreth një emri të përbashkët për President.
- Një marrëveshje politike ndërmjet partive parlamentare.
Në të dyja rastet kërkohet mbështetja e dy të tretave të deputetëve të Kuvendit. Nëse nuk arrihet asnjëra nga këto zgjidhje, vendi mund të shkojë në zgjedhje, një skenar i panevojshëm. LDK do të veprojë me përgjegjësi shtetërore, transparencë dhe vullnet për gjetjen e një zgjidhjeje.
Përditësime
Abdixhiku deklaroi në një postim në Facebook se pozicionet përputhen me deklaratën politike të miratuar në Kuvendin e LDK-së. Ai e quajti zgjedhjet një skenar të panevojshëm 'në këtë kohë', duke shtuar se ditët në vijim do të tregojnë rrugën e mundshme.