Grupi Parlamentar i Lidhjes Demokratike të Kosovës (LDK) mbajti më 27 mars 2026 mbledhjen e radhës për të diskutuar zhvillimet politike në vend, me theks të veçantë te rrjedhën institucionale pas aktgjykimit të Gjykatës Kushtetuese.
Sipas komunikatës së lëshuar, deputetët vlerësuan se aktgjykimi ka sjellë qartësi të nevojshme juridike dhe ka rikthyer procesin e zgjedhjes së presidentit në kornizën kushtetuese, duke përcaktuar rrugën që institucionet duhet të ndjekin më tej.
LDK riafirmon qëndrimin për respektim të plotë të rendit kushtetues, funksionim normal të institucioneve dhe ruajtje të balancës demokratike. Çdo veprim politik në këtë fazë duhet të udhëhiqet nga përgjegjësia shtetërore dhe jo nga kalkulimet partiake.
Partia mbetet e përkushtuar për një zgjidhje që garanton unitet institucional, përfaqësim gjithëpërfshirës dhe shmang çdo tendencë për përqendrim të pushtetit në një dorë të vetme. Institucioni i presidentit duhet të jetë figurë unifikuese, mbi palët politike dhe në shërbim të rendit kushtetues dhe stabilitetit të Republikës.
LDK thekson se zgjedhja e presidentit nuk mund të realizohet përmes improvizimeve procedurale, por vetëm përmes një marrëveshjeje të mirëfilltë politike që siguron unitet institucional dhe balancë demokratike. Në mungesë të saj, çdo tentativë tjetër është e destinuar të dështojë.
Përgjegjësia për ndërtimin e kësaj marrëveshjeje dhe menaxhimin e procesit i takon partisë së parë, Lëvizjes Vetëvendosje (LVV). Çdo dështim do të bartë drejtpërdrejt përgjegjësinë politike për pasojat, përfshirë shkuarjen në zgjedhje të parakohshme.
Në rast dështimi dhe zgjedhjesh të reja, LDK do të garojë e bashkuar, me vizion të qartë dhe e gatshme për besimin qytetar.