Departamenti Amerikan i Shtetit njoftoi se ka anuluar më shumë se 175,000 viza për shtetas të huaj, si pjesë e një fushate të gjerë për forcimin e kontrollit të emigracionit dhe sigurisë kombëtare. Sipas autoriteteve, ky vendim shënon një ritëm katër herë më të lartë të revokimeve krahasuar me vitin e fundit të administratës së Joe Biden.
Sipas njoftimit zyrtar, anulimet kanë shënjestruar individë që dyshohet se kanë shkelur kushtet e qëndrimit, kanë kryer vepra penale, kanë nxitur dhunë kundër qytetarëve amerikanë, ose kanë abuzuar me sistemin e emigracionit. Shumica e rasteve janë identifikuar pas kontakteve me organet e zbatimit të ligjit. Mes shkeljeve të raportuara janë sulmet fizike, drejtimi i automjetit nën ndikimin e alkoolit ose drogës, vjedhjet, dhuna në familje, si dhe akuzat për abuzim me të mitur ose trafikim njerëzor.
Sekretari i Shtetit, Marco Rubio, ka përcaktuar gjithashtu se një numër shtetasish të huaj janë të deportueshëm për arsye të politikës së jashtme. Kjo kategori përfshin individë të lidhur me fushata ndikimi të vendeve të tjera, si Kuba dhe Irani, si dhe persona që kanë bërë deklarata armiqësore ndaj presidentit të SHBA-së.
Një tjetër masë specifike është ndërmarrë nga një ambasadë amerikane në Afrikën e Veriut, e cila anuloi më shumë se 100 viza të prindërve që dyshohet se udhëtonin drejt SHBA-së me qëllim për të siguruar shtetësinë amerikane për fëmijët e tyre nëpërmjet lindjes. Administrata aktuale vazhdon të mbështesë politika më të rrepta, duke përfshirë verifikime të zgjeruara në rrjetet sociale, veprimtari kjo që është kundërshtuar nga organizatat e të drejtave të njeriut për shkak të shqetësimeve mbi privatësinë dhe lirinë e shprehjes.
Përditësime
Autoritetet amerikane intensifikuan shqyrtimin e vizave pas identifikimit të rasteve të rënda kriminale. Dokumentet e siguruara tregojnë për tërheqjen e lejeve për individë të akuzuar për trafikim të miturish dhe përdhunimin e personave me aftësi të kufizuara. Gjithashtu, Departamenti i Shtetit ndërmori masa ndaj drejtuesve të mjeteve në gjendje të rënduar, pas konfirmimit të rasteve të ngarjes nën ndikimin e heroinës dhe niveleve tejet të larta të alkoolit. Një shtetas kuvajtian është përfshirë në listën e personave të deportueshëm për arsye politike, pas shfaqjes së qëndrimeve armiqësore ndaj presidencës së SHBA-së.