Administrata e Shteteve të Bashkuara të Amerikës ka njoftuar zbatimin e menjëhershëm të një rregulloreje të re mbi përpunimin e kërkesave për azil. Masa synon të shkurtojë kohën e shqyrtimit dhe të përshpejtojë dëbimet, duke parashikuar që kërkesat të dërgohen drejtpërdrejt te gjyqtarët e imigracionit, pa u zhvilluar intervista fillestare me zyrtarët e Shërbimit të Shtetësisë dhe Imigracionit të SHBA-së (USCIS).
Sipas të dhënave zyrtare, ndryshimi pritet të ndikojë në afërsisht 444 724 raste që janë aktualisht në shqyrtim. Ky numër përbën një pjesë të konsiderueshme të totalit prej rreth 1,4 deri 1,5 milionë kërkesash për azil që ndodhen në pritje brenda sistemit amerikan. Sipas rregullores së re, gjyqtarët e imigracionit do të kenë autoritet më të gjerë për të rrëzuar disa çështje pa qenë e nevojshme zhvillimi i një seance dëgjimore.
Departamenti i Sigurisë Kombëtare dhe zyrtarë të administratës, përfshirë drejtorin e USCIS, Joseph Edlow, kanë argumentuar se sistemi aktual i azilit ndodhet në një krizë të paprecedentë. Ata pretendojnë se procedura e azilit është shfrytëzuar për të zgjatur qëndrimin e personave në territorin amerikan apo për të përfituar leje pune në mënyrë të pajustifikuar, në vend që të shërbejë vetëm për ata që përballen me persekutim real.
Kjo masë është pjesë e një strategjie më të gjerë të ndërmarrë nga presidenti Donald Trump që prej rikthimit të tij në Shtëpinë e Bardhë në vitin 2025. Synimi kryesor i kësaj politike mbetet ashpërsimi i kontrolleve kufitare, kufizimi i imigracionit të paligjshëm dhe përshpejtimi i dëbimeve të personave që nuk disponojnë dokumentacionin e duhur ligjor për të qëndruar në Shtetet e Bashkuara.