Presidenti i Federatës së Futbollit të Kosovës, Agim Ademi, po merr pjesë në punimet e Kongresit të 76-të të FIFA-s, i cili zhvillohet në Vancouver të Kanadasë.
Në prag të fillimit të punimeve, Ademi zhvilloi një takim me presidentin e UEFA-s, Aleksander Čeferin. Gjatë bashkëbisedimit u diskutuan zhvillimet aktuale në futboll, me fokus te mundësitë për avancimin e mëtejshëm të futbollit në Kosovë.
FFK përfaqësohet nga Agim Ademi dhe sekretari i përgjithshëm, Markus Weidner. Pjesëmarrja e delegacionit kosovar synon forcimin e marrëdhënieve ndërkombëtare dhe rritjen e prezencës së futbollit kosovar në arenën globale.
Gjatë kongresit pritet të diskutohen tema kyçe si reformat organizative, projektet zhvillimore, bashkëpunimet ndërmjet federatave, pasqyrat financiare të FIFA-s, vendimet për garat e ardhshme dhe sfidat për Kupën e Botës 2026. Ky samit shërben si platformë për FFK-në për të ndjekur trendet e administrimit të futbollit modern dhe për të forcuar partneritetet ndërkombëtare.