Më 13 maj 2016, në Kongresin e 66-të të FIFA-s në Meksiko City, Federata e Futbollit të Kosovës (FFK) u pranua si anëtare e 210-të e kësaj organizate botërore. FFK-ja mori 141 vota për anëtarësim, nga 164 vota valide.
Ky vendim kompletua misionin e FFK-së pas anëtarësimit në UEFA më 3 maj 2016, që kishte thyer izolimin 25-vjeçar të futbollit kosovar. Rrugëtimi u shoqërua me mundime dhe sakrifica, duke hapur një faqe të re në historinë e sportit në Kosovë.
Para votimit, anëtari i Këshillit të FIFA-s, Senesh Erzik, theksoi se Kosova kishte përmbushur të gjitha kriteret për anëtarësim.
Kryetari i atëhershëm i FFK-së, Fadil Vokrri, mbajti një fjalim ku sqaroi historinë e madhe të futbollit kosovar dhe përmendi pranimet nga Komiteti Olimpik Ndërkombëtar dhe federata të tjera sportive. Në fund, ai deklaroi se "futbolli është për të gjithë dhe të gjithë duhet të jenë për futbollin", duke kërkuar votat e delegatëve.
Nënkryetari i Federatës së Futbollit të Serbisë kundërshtoi anëtarësimin. Presidenti i FIFA-s, Gianni Infantino, theksoi se Kongresi është trupi suprem vendimmarrës dhe kaloi në votimin elektronik.
Pas pranimit, Vokrri falënderoi presidentin, zëvendëpresidentët dhe anëtarët e Këshillit të FIFA-s. Ai e quajti ditën vendimtare, premtoi mbrojtjen e vlerave të futbollit dhe shprehu gëzimin e të gjithë kosovarëve.
Përditësime
Fadil Vokrri deklaroi pas pranimit të Kosovës në FIFA: «Kjo është një datë shumë e rëndësishme për ne, pasi sot jemi pjesë e FIFA-s. Të gjithë në Kosovë gëzohen për këtë vendim të Kongresit të FIFA-s. E kemi pritur për një kohë të gjatë dhe jemi shumë të lumtur. Ju premtoj se do t’i mbrojmë vlerat e futbollit».