Një agjente e FBI-së, e cila kishte nisur hetimin fillestar për sulmin në Minneapolis, ku humbi jetën Renee Good, ka dhënë dorëheqjen. Sipas CNN-së, menjëherë pasi ajo e kishte hapur çështjen si shkelje të të drejtave civile, u urdhërua ta riklasifikonte si hetim për "sulm ndaj oficerit". Në të njëjtën kohë, FBI-ja ndaloi Byrosë e Hetimit Kriminal të Minesotës (BCA) të merrte pjesë në proces.
Dorëheqja vjen në një periudhë largimesh të shumta të agjentëve me përvojë në disa shtete të SHBA-së. Burime të shumta i thanë CNN-së se disa largime lidhen me masa pas rishikimit të sistemit të brendshëm të mesazheve të FBI-së, ku u zbuluan komente negative ndaj presidentit Donald Trump.
Largimet nën drejtimin e Kash Patel
Këto largime janë pjesë e një përpjekjeje të vazhdueshme të drejtuar nga drejtori i FBI-së, Kash Patel, për të përjashtuar individë të përfshirë në hetime të mëparshme, përfshirë ato që lidhen me Trump-in. Në këtë proces janë përfshirë zyrtarë të lartë në New Orleans, Miami dhe qytete të tjera.
Kjo valë vjen disa muaj pasi Patel u padit nga tre ish-zyrtarë të lartë të FBI-së, mes tyre ish-drejtori në detyrë në fillim të administratës së dytë të Trump-it. Ata pretendojnë se Patel u urdhërua të shkarkonte agjentë të tillë, përndryshe do të shkarkohej vetë.
Gjatë seancës së konfirmimit në janar të vitit të kaluar, Patel u tha ligjvënësve se askush në FBI "nuk do të shkarkohet për caktime çështjesh" dhe se "nuk do të kthehet pas". Ai deklaroi: "Nuk do të ketë politizim në FBI. Nuk do të ketë veprime hakmarrëse".
Megjithatë, këtë verë Shoqata e Agjentëve të FBI-së, një organizatë jofitimprurëse që mbështet agjentët aktualë dhe ish-agjentët, paralajmëroi ligjvënësit me një letër se Patel po merrte vendime për personelin pa respektuar garancitë e procesit të rregullt ligjor të parashikuara nga ligji federal. Shoqata theksoi se nuk kishte akuza të mëparshme për shkelje ndaj këtyre agjentëve.