Asociacioni i Gazetarëve të Kosovës (AGK) e cilësoi alarmues vendimin e Komisionit të Pavarur të Mediave (KPM) për licencimin e Radio Policisë si radio shtetërore, në formën e transmetimit eksperimental. Në një reagim të publikuar më 14 tetor, AGK-ja tha se një radio e drejtuar nga Policia mund t’u mundësojë institucioneve ligjzbatuese t’i përcjellin publikut informacione të njëanshme, pa iu nënshtruar shqyrtimit kritik nga mediat.
Asociacioni theksoi se gazetarët dhe mediat duhet të kenë mundësi të bëjnë pyetje, të sfidojnë qëndrimet e Policisë dhe ta mbajnë atë përgjegjëse për punën e saj, përmes kanaleve të hapura dhe të pavarura të komunikimit.
AGK-ja shprehu shqetësimin se radioja mund të keqpërdoret për qëllime partiake. Në reagim, ajo përmendi se sektorin e sigurisë e udhëheqin ministra dhe zëvendësministra të Lëvizjes Vetëvendosje. Sipas vlerësimit të Asociacionit, ekziston rrezik real që media shtetërore të përdoret për përhapjen e narrativave partiake.
Asociacioni kritikoi edhe procesin e përzgjedhjes së anëtarëve të KPM-së, të cilin e përshkroi si të komprometuar. Sipas AGK-së, Lëvizja Vetëvendosje kishte paracaktuar kandidatët e saj të preferuar. Ajo e cilësoi licencimin si vazhdimësi të një qasjeje të KPM-së që, sipas saj, favorizon pushtetin në dëm të informimit në interes publik.
AGK-ja shpreson që vendimi të kundërshtohet përmes rrugëve ligjore dhe që Radio Policia të mos bëhet funksionale. Ajo i bëri thirrje KPM-së të vendosë interesin e qytetarëve përpara interesave partiake ose qeveritare.
Në reagim, Asociacioni vlerësoi bashkëpunimin tradicionalisht të mirë të Policisë me gazetarët dhe mediat, por tha se nuk e sheh nismën e radios si një hap që ndihmon në ruajtjen dhe forcimin e këtij bashkëpunimi.