Asociacioni i Gazetarëve të Kosovës (AGK) ka reaguar ashpër pas propozimit të nënkryetares së Komisionit të Pavarur të Mediave (KPM), Drita Morina, për të shqyrtuar mbylljen e emisionit “Debat Plus” në RTV Dukagjini në mbledhjen e radhës.
AGK e ka cilësuar këtë deklaratë si të papranueshme dhe të papërgjegjshme, duke e konsideruar si sulm frontal ndaj lirisë së medias dhe shprehjes në Kosovë. Në reagimin e saj, organizata thekson se diskutimi i tillë është vazhdimësi e vendimeve të pabazuara ndëshkuese ndaj mediave.
Nënvizohet se KPM-ja nuk është e autorizuar të dënojë mediat apo gazetarët për shkak të debateve ose deklaratave të të ftuarve në emisione. Sipas AGK-së, vendimet e paprecedenta me gjoba nga përbërja e re e KPM-së vërtetojnë alarmin se ky institucion është vënë tërësisht në funksion të politikave të Lëvizjes Vetëvendosje dhe Qeverisë, të cilat synojnë intimidimin e mediave dhe gazetarëve.
AGK ka ftuar KPM-në që të heqë dorë menjëherë nga praktikat ndëshkuese dhe të ushtrojë mandatin e saj konform ligjit, duke theksuar se pluralizmi mediatik është vlerë që nuk mund të zhbëhet përmes vendimeve administrative.