Këshilli i Mediave të Shkruara të Kosovës (KMShK) ka reaguar përmes një deklarate publike, duke dënuar deklaratat e nënkryetares së Komisionit të Pavarur të Mediave (KPM), Drita Morina, e cila ka paralajmëruar mbylljen e emisionit “Debat Plus” në RTV Dukagjini.
Në një vendimmarrje urgjente online, KMShK ka vlerësuar se këto deklarata janë të pabazuara në Kodin e Etikës së KPM-së dhe përbëjnë ndërhyrje të papranueshme në punën e mediave. Këshilli ka theksuar se organet rregullatore duhet të veprojnë me kujdes të shtuar gjatë trajtimit të ankesave që lidhen me padi të tipit SLAPP, të cilat shpesh përdoren nga eksponentë politikë për të ushtruar presion ndaj hapësirës mediatike.
Në reagimin e tij, KMShK ka kërkuar që institucionet e pavarura të ruajnë integritetin dhe standardet profesionale, duke shmangur deklaratat që cenojnë lirinë e shprehjes. Po ashtu, KMShK u ka bërë thirrje anëtarëve të KPM-së që të distancohen publikisht nga nismat e tilla, të cilat u cilësuan si të pamatura dhe të dëmshme për ambientin mediatik në Kosovë.