Këshilli i Pavarur i Mediave (KPM) u mbledh më 15 maj 2026 për të shqyrtuar 26 raste që lidhen kryesisht me mbulimin mediatik të zgjedhjeve të shkurtit 2025.
Ndërmjet vendimeve, KPM ka shqiptuar gjobë prej 3 mijë euro ndaj televizionit Klan Kosova. Sipas kryetarit të KPM-së, Besnik Berisha, kronikat kanë pasur qasje të anshme, të pabalancuara dhe të bazuara vetëm në një burim informacioni të lidhur me pushtetin aktual.
Gjithashtu, KPM ka shqiptuar gjoba ndaj RTK1 dhe Kanal10 për shkelje të ngjashme. Për televizionin T7, gjoba është 4 mijë euro për shkelje ku, sipas Berishës, në emisione është folur me konotacion negativ, pa dalluar faktin nga opinioni.
Vendime të tjera janë marrë ndaj RTV Dukagjini dhe Tëvë1, kryesisht për çështje të zgjedhjeve dhe reklamimit politik.
Kryetari i Asociacionit të Gazetarëve të Kosovës (AGK), Xhemajl Rexha, që po monitoron mbledhjen, e ka quajtur arsyetimin e KPM-së skandaloz dhe dëshmi të kapjes së këtij institucioni nga Vetëvendosje. Ai pret se këto vendime synojnë të disiplinojnë mediat dhe të dirigjojnë politikat redaktoriale, duke goditur lirinë e shprehjes.
AGK dhe organizatat e shoqërisë civile kanë paralajmëruar se do të dalin me qëndrim zyrtar pas përfundimit të mbledhjes.