Deputetja e LDK-së, Hykmete Bajrami, ka reaguar publikisht ndaj propozimit të nënkryetares së Komisionit të Pavarur të Mediave (KPM), Drita Morina, për shqyrtimin e mundësisë së mbylljes së emisionit Debat Plus në RTV Dukagjini.
Në qëndrimin e saj, Bajrami theksoi se liria e medias nuk duhet mbrojtur vetëm kur raportimi është i favorshëm. Ajo deklaroi se, ndonëse është ndier personalisht e dëmtuar nga ky emision, ajo kundërshton çdo përpjekje të pushtetit për të kontrolluar, ndëshkuar apo heshtur mediat.
Sipas deputetes, gjatë fushatave elektorale, moderatori i emisionit ka përsëritur në mënyrë të njëanshme dhe jashtë kontekstit pretendimin se ajo "nuk e ka problem Listën Serbe". Ajo tha se ky trajtim është shfrytëzuar për të krijuar narrativë të pavërtetë, duke përfshirë shpërndarjen e fotove dhe videove të manipuluara përmes inteligjencës artificiale, gjë që ka rezultuar me kërcënime dhe pasiguri për familjen e saj.
"Liria e medias nuk mbrohet vetëm kur media sillet mirë me ne; ajo mbrohet sidomos kur kemi arsye personale për t’u ndier të dëmtuar prej saj", deklaroi Bajrami. Ajo shtoi se çdo presion institucional ndaj mediave është i rrezikshëm dhe bie ndesh me standardet demokratike, duke u shprehur se: "Një media e lirë mund të gabojë, ndërsa një media e kontrolluar është vetë gabimi".
Në fund të reagimit, ajo u bëri thirrje mediave që, përkundër lirisë së tyre, të respektojnë standardet më të larta etike, profesionale dhe ligjore gjatë punës së tyre.