Bordi i Asociacionit të Komunave të Kosovës (AKK) ka shprehur shqetësimin për zvarritjen e procesit të kompensimit të dëmeve nga vërshimet nëpër komuna. Përmes një reagimi publik, ky institucion ka kërkuar nga qeveria veprime të menjëhershme për mbështetjen e qytetarëve.
Sipas AKK-së, është e papranueshme që një pjesë e madhe e dëmeve nga vërshimet e vitit 2023 dhe ato të janarit të vitit 2026 mbeten ende të pakompensuara. Asociacioni thekson se pushteti lokal i ka përmbushur detyrimet për vlerësimin e dëmeve në terren, ndërsa përgjegjësia tashmë mbetet tek institucionet qendrore.
Në drejtim të institucioneve qendrore, AKK ka parashtruar tri kërkesa kyçe:
• Kompensimin e menjëhershëm të dëmeve nga vërshimet e vitit 2023 dhe janarit 2026.
• Ndarjen e fondeve urgjente për komunat e prekura nga vërshimet e fundit.
• Themelimin e një Fondi Emergjent për Komunat, si mekanizëm i përhershëm për reagim ndaj fatkeqësive natyrore.
Në deklaratën e tij, AKK ka nënvizuar se qytetarët nuk kanë nevojë për vizita simbolike apo fotografi, por për vendime të shpejta dhe mbështetje reale për rikuperimin e pasurive të dëmtuara.