Gjatë protestës së organizuar sot, kryetarët e komunave të Kosovës kërkuan nga niveli qendror një qasje më përgjegjëse dhe ndërprerjen e praktikave të centralizimit. Kryetari i Komunës së Rahovecit, Smajl Latifi, denoncoi vonesat në kompensimin e dëmeve të shkaktuara nga fatkeqësitë natyrore, duke vënë në dukje se shumë raste të evidentuara që nga viti 2022 mbeten ende të paadresuara. Latifi gjithashtu kritikoi ndarjen e mjeteve për grantin e performancës, duke theksuar se nga 8 milionë euro të planifikuara në Ligjin për Buxhetin e vitit 2026, komunave u janë ndarë vetëm 2 milionë euro, duke lënë një boshllëk prej 6 milionë eurosh.
Shtatë kërkesat e komunave ndaj Qeverisë
Sazan Ibrahimi, drejtor ekzekutiv i Asociacionit të Komunave të Kosovës (AKK), paraqiti shtatë kërkesat zyrtare që komunat i drejtojnë qeverisë:
- Kompensimi i obligimeve financiare që burojnë nga kontratat kolektive, të cilat po rëndojnë buxhetet lokale përmes procedurave përmbarimore.
- Mbulimi nga buxheti qendror i pagesave retroaktive për përvojën e punës prej 0.5% për vitet 2023, 2024 dhe 2025.
- Rishikimi i kritereve të grantit specifik për arsim, pasi mbi 3,100 mësimdhënës kanë mbetur pa financim, duke krijuar një borxh prej mbi 24 milionë eurosh.
- Ndalimi i praktikave të centralizimit që cenojnë pronën komunale dhe kompetencat vetanake.
- Kërkimi i përgjegjësisë institucionale për humbjen e mbështetjes financiare nga Bashkimi Evropian dhe zvogëlimin e mjeteve të grantit të performancës.
- Kompensimi i plotë i dëmeve të shkaktuara nga vërshimet dhe fatkeqësitë natyrore që nga viti 2022.
- Krijimi i një granti të katërt për investime kapitale, me kritere të qarta, ligjore dhe transparente.
Sipas Ibrahimit, këto kërkesa përfaqësojnë interesat e qytetarëve dhe komunave, ndërsa theksoi se asociacioni do të vazhdojë të përdorë të gjitha mjetet demokratike për mbrojtjen e kompetencave komunale.
Përditësime
Sazan Ibrahimi, kryetar i Asociacionit të Komunave të Kosovës, zbuloi se buxhetet komunale janë dëmtuar rëndë nga proceset gjyqësore. Ibrahimi deklaroi se gjatë katër viteve të fundit, komunave u janë marrë mbi 382 milionë euro përmes vendimeve gjyqësore të ekzekutuara. Kjo shumë përfaqëson një barrë shtesë financiare që rëndon mbi stabilitetin e buxheteve lokale dhe investimet kapitale të planifikuara.