Raporti i Komisionit të Prokurimit Publik (KPP) për vitin 2025, i dorëzuar në Kuvend, identifikon institucionet më problematike në prokurimet publike, me tenderë të kontestuar në vlerën e qindra milionë eurove.
Agjencia Kombëtare për Shoqërinë e Informacionit (AKSHI) renditet e para me 94 tenderë të zhvilluar, prej të cilëve 43 janë ankimuar në KPP, pothuajse gjysma. Në 62.7% të këtyre ankesave, KPP u dha të drejtë kompanive ankuese plotësisht ose pjesërisht, duke konstatuar shkelje nga institucioni. Vlera e tenderëve të ankimuar arrin 10.7 miliardë lekë, ose 111 milionë euro.
Dy ish-drejtueset e AKSHI-së janë në hetim prej muajsh nga Prokuroria e Posaçme, të dyshuara për pjesëmarrje në një grup të strukturuar kriminal që synonte përvetësimin e tenderëve. Hetimet nisën pas pengmarrjes në gusht 2025 të biznesmenit Gerond Meçe, me qëllim shtrëngimin e tij për të hequr dorë nga ankesat në KPP kundër tenderëve të AKSHI-së.
Problematikat nuk kufizohen te AKSHI. Raporti tregon se 52% e ankesave të paraqitura në KPP nga kompani janë gjetur të bazuara, për tenderë me vlerë totale mbi 33 miliardë lekë, ose 343 milionë euro. Gjatë 2025-së u regjistruan 1197 ankesa, duke bllokuar fonde mbi 100 miliardë lekë.
Institucionet me më shumë ankesa
- Posta Shqiptare
- Qendra Spitalore Universitare Nënë Tereza (QSUT)
- Sh.A. Albpetrol
- Ujësjellës Kanalizime Tiranë
- Bashkia Kamëz
- Bashkia Durrës
- Spitali Rajonal Durrës
- Bashkia Tiranë
- Operatori i Blerjeve të Përqëndruara
Problematikat kryesore lidhen me vlerësimin e ofertave, që përbën mbi 60% të ankesave, dhe kriteret e tenderimit, të cilat shpesh kufizojnë konkurrencën.