Një aksident ajror ka ndodhur të mërkurën në mbrëmje në Aeroportin Carlisle, në Qarkun Cumberland të Pensilvanisë, ku një avion i vogël Cessna 150 është përplasur me një helikopter Bell 407 të Policsë Shtetërore të Pensilvanisë. Si pasojë e përplasjes, piloti i avionit, i cili dyshohet se ishte personi i vetëm në bord, ka ndërruar jetë në vendngjarje.
Dy oficerët e policisë që ndodheshin në helikopter, pjesë e njësisë elitare të aviacionit, mbetën të plagosur. Sipas deklaratave zyrtare të nënkolonelit George Bivens, oficerët nuk janë në rrezik për jetën. Ata mbetën përkohësisht të bllokuar në rrënojat e helikopterit pas përplasjes, por arritën të dilnin nga mjeti para mbërritjes së forcave të emergjencës.
Sipas informacioneve të bëra të ditura nga autoritetet, helikopteri, me bazë në Harrisburg, ishte duke kryer një stërvitje rutinë në një zonë me bar pranë pistës dhe ndodhej disa metra mbi tokë. Cessna 150 është afruar nga pas, ka ndryshuar drejtim dhe ka goditur helikopterin. Nënkoloneli Bivens deklaroi se pilotët e helikopterit nuk kanë pasur mundësi ta shihnin avionin që po i afrohej, duke e përshkruar si një përplasje shumë të dhunshme.
Pas ngjarjes, në vendin e aksidentit kanë mbërritur autoritetet përkatëse, ndërsa hetuesit e Bordit Kombëtar të Sigurisë së Transportit (NTSB) kanë nisur punën gjatë natës për të përcaktuar shkaqet dhe rrethanat e incidentit. Guvernatori i Pensilvanisë, Josh Shapiro, është njoftuar për situatën dhe ka ndjekur nga afër zhvillimet lidhur me operacionin e shpëtimit dhe hetimin.