Një helikopter lajmesh i stacionit NBC4 Los Angeles është rrëzuar të martën, rreth orës 19:00, në lagjen Chatsworth të Los Angelesit. Sipas Departamentit të Zjarrfikësve të Los Angelesit (LAFD), nga ky incident kanë humbur jetën 3 persona, ndërsa një person i katërt është dërguar në spital për trajtim mjekësor.
Helikopteri po operonte në zonë për të raportuar nga ajri mbi një aksident rrugor të ndodhur më herët, ku një automjet SUV ishte përplasur me një autobus. Kapiteni Branden Silverman nga LAFD bëri të ditur se helikopteri u rrëzua midis dy ndërtesave tregtare, duke shkaktuar një zjarr që përfshiu katër automjete dhe dy kontenierë magazinimi. Mbi 50 zjarrfikës u angazhuan për të shuar flakët.
Prezantuesja e NBC4, Colleen Williams, konfirmoi në një transmetim të drejtpërdrejtë se helikopteri i përkiste stacionit të tyre dhe se kishin humbur kontaktin me ekipin. Autoritetet, përfshirë kryebashkiaken Karen Bass, shprehën ngushëllimet për viktimat e të dyja ngjarjeve tragjike në Chatsworth.
Ndërsa shkaqet e rrëzimit mbeten ende të paqarta, Bordi Kombëtar i Sigurisë së Transportit (NTSB) dhe Administrata Federale e Aviacionit (FAA) kanë nisur hetimet për të përcaktuar rrethanat e sakta. Departamenti i Policisë së Los Angelesit (LAPD) sqaroi se helikopteri nuk ishte në pronësi ose përdorim të forcave të rendit.