Një avion i vogël u rrëzua të hënën në mëngjes në Los Angeles, Shtetet e Bashkuara, pasi goditi telat e tensionit të lartë dhe një shtyllë elektrike, duke u përmbysur në parkingun e dyqanit O’Reilly Auto Parts në zonën Pacoima, pranë kryqëzimit Sutter Avenue dhe Van Nuys Boulevard.
Sipas Los Angeles Fire Department, piloti, një burrë rreth 70 vjeç, u transportua në spital në gjendje kritike. Ai ishte i vetmi person në bord dhe nuk raportohen të lënduar të tjerë.
Ngjarja ndodhi pranë Aeroportit Whiteman. Pamjet nga vendi tregojnë dëshmitarë që përpiqeshin të ndihmonin pilotin, ndërsa zjarrfikësit ndërhynë për të mbuluar rrjedhjen e karburantit me zhavorr pranë rrënojave. Autoritetet njoftuan se telat e tensionit të lartë ishin të rrëzuara dhe piloti ndodhej ende brenda avionit gjatë operacionit të shpëtimit.
Në një deklaratë, Whiteman Airport Coalition bëri të ditur se avioni Cessna ishte marrë me qira nga piloti në momentin e aksidentit.
Video nga kamera dashcam regjistroi momentin e përplasjes me telat dhe rënien në parking. Të njëjtat pamje u shpërndanë nga ABC News dhe aplikacioni Citizen, duke konfirmuar shpëtimin e pilotit dhe praninë e shërbimeve të emergjencës.