Mëngjesin e së dielës, dy helikopterë janë përplasur në ajër në zonën jugperëndimore të Rio de Janeiros, në lagjen Recreio dos Bandeirantes. Nga përplasja dhe rrëzimi i mëpasshëm kanë humbur jetën të gjithë personat në bord, gjithsej gjashtë viktima, të cilët përfshinin pilotët dhe katër pasagjerët e njërit prej mjeteve.
Sipas informacioneve nga vendngjarja, mbetjet e mjeteve fluturuese janë shpërndarë në një rreze prej të paktën 100 metrash, ndërsa pjesë të tyre kanë rënë mbi çatitë e ndërtesave në afërsi. Njëri prej helikopterëve u rrëzua pranë një parkingu me automjete elektrike, duke shkaktuar shpërthime dytësore dhe zjarre, të cilat u vunë nën kontroll pas disa orësh nga ekipet e zjarrfikësve.
Për shkak të operacionit të sigurisë dhe parandalimit të rrezikut nga rrjedhjet e karburantit, autoritetet vendase ndërprenë përkohësisht qarkullimin në bulevardin bregdetar Avenida das Américas.
Forcat Ajrore të Brazilit njoftuan se CENIPA ka nisur hetimet për të zbardhur rrethanat e ngjarjes. Ekipet teknike po analizojnë të dhënat e fluturimit dhe komunikimet mes pilotëve për të kuptuar shkakun e aksidentit, i cili mbetet ende i paqartë.
Përditësime
Autoritetet kanë zbardhur detaje të reja pas përplasjes së dy helikopterëve në Rio de Janeiro, ku humbën jetën 6 persona:
- Ekipet e emergjencës u njoftuan për ngjarjen në orën 08:59.
- Njëri prej mjeteve u rrëzua në oborrin e një kishe të braktisur, ndërsa i dyti u gjet i përmbysur në terren pa shpërthyer.
- Në helikopterin e parë ndodheshin 5 persona (piloti dhe 4 pasagjerë), ndërsa në të dytin vetëm 1 pilot.