Një aksident tragjik me pasojë vdekjen është regjistruar mëngjesin e datës 21 gusht në aksin rrugor “Shkozet-Shijak”, në vendin e quajtur Rrashbull. Viktima, shtetasi Vasil Hasani, 32 vjeç, ishte duke lëvizur me biçikletë kur u përplas për vdekje nga një automjet ende i paidentifikuar.
Sipas njoftimit zyrtar të Policisë së Durrësit, ngjarja ka ndodhur rreth orës 06:15. Përplasja ka qenë fatale, duke sjellë humbjen e jetës së 32-vjeçarit në vendngjarje. Pas aksidentit, drejtuesi i mjetit është larguar menjëherë nga vendi i ngjarjes, duke iu shmangur detyrimeve ligjore.
Grupi hetimor ka mbërritur në vendin e ngjarjes dhe, nën drejtimin e Prokurorisë, ka nisur punën për zbardhjen e plotë të rrethanave dhe shkaqeve të aksidentit. Aktualisht, vijojnë kërkimet intensive për identifikimin dhe kapjen e drejtuesit të automjetit të përfshirë në këtë ngjarje.
Përditësime
Policia e Durrësit identifikoi dhe arrestoi autorin e dyshuar të ngjarjes, një 38-vjeçar nga Sukthi. Efektivët gjetën gjithashtu automjetin tip Benz A-Class të përfshirë në aksident. Hetimet saktësuan se aksidenti ndodhi në aksin Rrashbull-Xhafzotaj, ndërsa mosha e viktimës është 41 vjeç, e korrigjuar nga 32 vjeç e raportuar fillimisht.