Një aksident trafiku me pasoja fatale ka ndodhur në orët e para të mëngjesit të datës 23 korrik 2026, në rrugën nacionale Mitrovicë-Prishtinë. Sipas konfirmimeve zyrtare nga Policia e Kosovës, ngjarja është shënuar rreth orës 05:00 në afërsi të fshatit Studime.
Në aksident janë përfshirë dy automjete. Për pasojë, një grua ka humbur jetën, ndërsa disa persona të tjerë kanë mbetur të lënduar. Ekipet mjekësore, emergjencat dhe forcat e zjarrfikësve kanë dalë menjëherë në vendin e ngjarjes për të ofruar ndihmën e nevojshme.
Zëdhënësi i Policisë së Kosovës, Daut Hoxha, deklaroi se policia ka nisur hetimet për të zbardhur rrethanat dhe shkaqet e këtij aksidenti. Në prononcimin e tij, Hoxha u bëri thirrje drejtuesve të automjeteve që të tregojnë kujdes të shtuar gjatë pjesëmarrjes në trafik.
"Kërkojmë nga të gjithë drejtuesit e automjeteve të jenë më të kujdesshëm, të respektojnë shenjat e trafikut dhe kushtet e rrugës. Mos përdorni telefonat gjatë vozitjes, sepse shpërqendrimi mund të jetë fatal për ju dhe pjesëmarrësit e tjerë në trafik", ka theksuar Hoxha.
Përditësime
Policia e Kosovës ka konfirmuar se nga aksidenti fatal në magjistralen Mitrovicë-Prishtinë ka humbur jetën një 52-vjeçare, ndërsa pesë persona të tjerë kanë mbetur të lënduar.