Një aksident i rëndë është shënuar këtë të mërkurë, më 2 shtator 2026, në aksin rrugor Rinas–Fushë-Krujë, në zonën e njohur si Ura e Gjolës. Sipas të dhënave paraprake, përplasja ka ndodhur kur automjeti tip Benz, që udhëtonte nga Rinasi në drejtim të Fushë-Krujës, dyshohet se ka kryer një parakalim të gabuar. Për pasojë, mjeti është përplasur kokë më kokë me një automjet tip Land Rover, i cili lëvizte në drejtim të kundërt, nga veriu drejt jugut.
Në vendngjarje kanë mbërritur menjëherë shërbimet e Policisë së Tiranës dhe ekipet e emergjencës, të cilat kanë bërë të mundur transportimin e të plagosurve drejt Spitalit të Traumës në Tiranë. Sipas raportimeve, drejtuesi i automjetit tip Benz është me banim nga Korça.
Autoritetet po punojnë për zbardhjen e dinamikës së plotë dhe shkaqeve që çuan në këtë përplasje. Ndërsa disa burime shprehen me siguri mbi humbjen e jetës së njërit prej drejtuesve, organet zyrtare dhe spitalore nuk kanë dalë ende me një njoftim përfundimtar për konfirmimin e vdekjes.
Përditësime
Policia e Tiranës konfirmoi zyrtarisht vdekjen e 26-vjeçarit Xhesjon Zogu, i cili mbeti viktimë e përplasjes në aksin Rinas-Fushë-Krujë. Autoritetet identifikuan drejtuesin e mjetit tjetër të përfshirë në aksident si shtetasi Behar Ruçi. Hetimet për dinamikën e ngjarjes janë duke vijuar.