Një aksident tragjik ka ndodhur në qytetin e Prizrenit, ku një biçiklist 78-vjeçar ka humbur jetën pas përplasjes me një automjet. Ngjarja është regjistruar në rrugën “Faik Konica”, ku mjeti ka goditur biçiklistin me pjesën e përparme.
Zëdhënësi i Policisë së Kosovës për rajonin e Prizrenit, Shaqir Bytyqi, konfirmoi se viktima pësoi lëndime të rënda trupore. Pas ndihmës së parë në vendngjarje, 78-vjeçari u dërgua për trajtim të specializuar në Qendrën Klinike Universitare të Kosovës (QKUK) në Prishtinë. Megjithatë, për shkak të plagëve të marra, viktima ndërroi jetë pas disa orësh.
Lidhur me rastin, prokurori kujdestar ka urdhëruar ndalimin policor për ngasësin e dyshuar të automjetit. Trupi i pajetë është dërguar për autopsi, ndërsa autoritetet policore, në koordinim me prokurorin e shtetit, po vijojnë hetimet për të zbardhur rrethanat dhe shkaqet e aksidentit.
Përditësime
Policia e Kosovës ka konfirmuar se një mashkull kosovar është i dyshuari për aksidentin me fatalitet në Prizren, ku humbi jetën një 78-vjeçar. Trupi i viktimës është dërguar në Institutin e Mjekësisë Ligjore (IML) për obduksion.