Një këmbësor ka humbur jetën në një aksident trafiku në fshatin Piranë të Prizrenit më 22 mars 2026, rreth orës 18:30. Ngjarja ndodhi në magjistralen Prizren–Gjakovë.
Sipas zëdhënësit të Policisë për Rajonin e Prizrenit, Shaqir Bytyqi, një veturë ka goditur këmbësorin D.H., mashkull rreth 81-vjeçar, gjatë përpjekjes për të kaluar rrugën. Viktima ka ndërruar jetë në vendin e ngjarjes për shkak të lëndimeve të rënda trupore, siç është konstatuar nga ekipi mjekësor emergjent.
Njësitë policore kanë mbërritur menjëherë në vendngjarje dhe kanë ndërmarrë veprimet hetimore të nevojshme. I dyshuari është arrestuar dhe, me vendim të prokurorit, ndaluar për procedura të mëtejme.
Me urdhër të prokurorit, trupi i pajetë i viktimës është dërguar për obduksion në Institutin e Mjekësisë Ligjore në Prishtinë. Policia vazhdon hetimet për zbardhjen e plotë të rrethanave të aksidentit.