Një aksident me fatalitet ka ndodhur gjatë ditës së sotme, më 2 shtator 2026, në aksin rrugor Ferizaj-Prishtinë. Si pasojë e përplasjes nga një automjet, një këmbësor ka humbur jetën.
Lajmin e ka konfirmuar për mediat zëdhënësja e Policisë së Kosovës për rajonin e Prishtinës, Flora Ahmeti. Sipas deklaratës së saj, autoritetet janë njoftuar për aksidentin rreth orës 15:30.
“Sot rreth orës 15:30, kemi pranuar informatën se në rrugën Ferizaj-Prishtinë ka ndodhur një aksident trafiku. Në këtë aksident ka qenë i përfshirë një automjet dhe një këmbësor. Si pasojë e aksidentit, këmbësori ka vdekur. Vdekja e viktimës është konstatuar nga ekipi mjekësor në Qendrën Klinike Universitare të Kosovës (QKUK)”, ka deklaruar Ahmeti.
Në zonën e Veternikut, ku ndodhi ngjarja, janë dërguar njësitet përkatëse policore. Organet e rendit kanë nisur procedurat hetimore për dokumentimin e provave dhe sqarimin e rrethanave të plota që çuan në këtë ngjarje tragjike.