Aksidenti ka ndodhur rreth orës 10:00, kur dy mjete të rënda transporti janë përplasur ndërsa lëviznin në autostradën “Ibrahim Rugova”. Si pasojë e këtij aksidenti, dy persona kanë pësuar lëndime trupore.
Zëdhënësi i Policisë së Kosovës, Daut Hoxha, ka konfirmuar për mediat se rasti është marrë në trajtim nga Njësiti për Menaxhimin dhe Kontrollin në Autostradë. Policia u ka bërë thirrje të gjithë pjesëmarrësve në trafik që të jenë të kujdesshëm, të përshtatin shpejtësinë me kushtet e rrugës dhe të respektojnë rregullat e qarkullimit për të shmangur ngjarje të tilla në të ardhmen.