Një aksident trafiku ndodhi gjatë mëngjesit të sotëm në fshatin Lutogllavë të komunës së Pejës, ku u përfshinë një tren i udhëtarëve dhe një automjet. Lajmin e konfirmoi zëdhënësi i Policisë për Rajonin e Pejës, Driton Rugova. Sipas të dhënave zyrtare, rasti është raportuar në polici rreth orës 10:10.
Si pasojë e kësaj përplasjeje, një person ka pësuar lëndime trupore. Pas ndihmës së parë, ai u dërgua në Spitalin Rajonal të Pejës për trajtim të mëtejshëm mjekësor. Ekipet mjekësore kanë bërë të ditur se i lënduari ka pësuar lëndime të lehta trupore.
Në vendin e ngjarjes ka dalë Njësiti për Hetimin e Aksidenteve të Trafikut, i cili po vazhdon hetimet për të zbardhur rrethanat dhe shkaqet që çuan në këtë aksident. Deri më tani, nuk janë raportuar detaje të tjera mbi shkaktarët e mundshëm të këtij incidenti.