Një aksident trafiku me pasojë vdekjen ka ndodhur në orët e para të ditës së sotme në fshatin Cërrcë të Istogut. Policia e Kosovës për rajonin e Pejës njoftoi se ngjarja është raportuar rreth orës 00:02.
Në këtë aksident janë përfshirë dy automjete dhe si pasojë e përplasjes, tre persona kanë pësuar lëndime trupore. Të lënduarit janë dërguar me autoambulancë për trajtim mjekësor në Spitalin Rajonal të Pejës. Sipas ekipit mjekësor, njëri prej tyre ka arritur në spital pa shenja jete, ndërsa personi tjetër, për shkak të natyrës së lëndimeve, është dërguar për trajtim të mëtejshëm në Qendrën Klinike Universitare të Kosovës (QKUK) në Prishtinë.
Në vendin e ngjarjes kanë dalë njësitet kompetente të Njësisë Rajonale të Komunikacionit Rrugor, ekipi mjekësor dhe njësiti i zjarrfikësve. Me urdhër të prokurorit të shtetit, trupi i pajetë i viktimës është dërguar në Institutin e Mjekësisë Ligjore në Prishtinë për kryerjen e obduksionit. Hetimet mbi shkaqet dhe rrethanat e këtij aksidenti janë duke u kryer nga hetuesit e Njësisë Rajonale të Komunikacionit Rrugor në kuadër të Drejtorisë Rajonale të Policisë në Pejë.
Përditësime
Autoritetet kanë identifikuar viktimën e aksidentit të ndodhur në fshatin Cërrcë. Bëhet fjalë për shtetasin Arben Nekaj nga Istogu.