Dy ngjarje të rënda rrugore janë shënuar së fundmi në territorin e Komunës së Istogut.
Në fshatin Cerrcë, gjatë orëve të para të datës 1 shtator 2026, ka ndodhur një aksident trafiku me fatalitet. Sipas Policisë së Kosovës, ngjarja u raportua rreth orës 00:02, ku u përfshinë një veturë me targa vendore dhe një minibus. Për pasojë, dy drejtuesit dhe një pasagjer pësuan lëndime trupore dhe u dërguan në Spitalin e Pejës, ku mjeku kujdestar konstatoi vdekjen e njërit prej tyre. Me vendim të prokurorit, trupi i pajetë është dërguar në Institutin e Mjekësisë Ligjore për obduksion.
Ndërkohë, një tjetër aksident ka ndodhur mesditën e datës 2 shtator 2026 në fshatin Tomoc. Zëdhënësi i Policisë për Rajonin e Pejës, Driton Rugova, konfirmoi se aksidenti u raportua rreth orës 13:30. Në këtë rast janë përfshirë dy vetura, ku për pasojë tre persona kanë pësuar lëndime trupore. Të lënduarit janë dërguar për trajtim të mëtejshëm mjekësor në Spitalin Rajonal të Pejës.