Një aksident i rëndë trafiku ndodhi të hënën, më 20 korrik 2026, në fshatin Shushicë të komunës së Istogut. Në aksident u përfshinë dy automjete me targa vendore, duke shkaktuar vdekjen e dy personave dhe lëndimin e tre të tjerëve, të cilët po marrin trajtim mjekësor në Spitalin Rajonal të Pejës.
Zëdhënësi i Policisë së Kosovës për rajonin e Pejës, Fadil Gashi, konfirmoi se vdekja e njërës viktimë u konstatua në vendin e ngjarjes nga mjeku kujdestar, ndërsa viktima e dytë ndërroi jetë gjatë rrugës për në spital. Kryetari i Istogut, Ilir Ferati, përmes një njoftimi në rrjetet sociale, shprehu ngushëllime për familjen Qorraj, duke konfirmuar se mes viktimave është edhe një fëmijë.
Në vendin e ngjarjes kanë dalë njësitë e Policisë së Kosovës, ekipet e emergjencës, zjarrfikësit dhe Prokurori i Shtetit. Me urdhër të prokurorit, trupat e pajetë janë dërguar për obduksion në Institutin e Mjekësisë Ligjore në Prishtinë. Lidhur me rastin, një person është ndaluar për 48 orë, ndërsa hetimet për zbardhjen e rrethanave të aksidentit po vazhdojnë nga hetuesit kompetentë të komunikacionit rrugor.