Një aksident rrugor është regjistruar të hënën në rrugën nacionale Lushnjë-Berat, në dalje të fshatit Çiflik. Një automjet tip Ford ka humbur kontrollin, ka goditur shtyllën elektrike të tensionit të lartë dhe ka përfunduar në kanalin vaditës përgjatë rrugës.
Dy persona që udhëtonin në mjet janë transportuar me urgjencë në Spitalin e Lushnjës, ku po marrin ndihmë mjekësore dhe ndodhen jashtë rrezikut për jetën.
Policia e qarkullimit rrugor ka mbërritur në vendngjarje për të zbardhur shkaqet dhe për të dokumentuar ngjarjen. Punonjësit e OSHEE-së kanë ndërprerë furnizimin me energji elektrike për shkak të shtyllës së dëmtuar dhe kabllove të këputura.
Sipas deklaratave paraprake të drejtuesit, ai ka shmangur përplasje me një automjet tjetër që kishte kryer manovër të gabuar gjatë parakalimit, çka ka çuar në përplasjen me shtyllën.
Ky segment rrugor është problematik, pasi ka vetëm dy korsi dhe kalon nëpër zona të banuara. Përdoret nga automjete të tonazheve të ndryshme, mjete bujqësore, biçikleta dhe kafshë, duke e bërë burim të aksidenteve të përsëritura.