Mëngjesin e kësaj të mërkure, një aksident rrugor është regjistruar në aksin Rrogozhinë-Lushnjë, në vendin e njohur si rrethrrotullimi i Çermës. Në aksident janë përfshirë një furgon mallrash dhe një mjet bujqësor.
Sipas informacioneve paraprake, përplasja ka ndodhur kur furgoni ka goditur nga pas mjetin bujqësor. Si pasojë e goditjes, drejtuesi i mjetit bujqësor, shtetasi Ajet Kullolli, 50 vjeç, banues në Çermë, ka pësuar dëmtime të rënda.
I dëmtuari ka marrë ndihmën e parë mjekësore në Spitalin e Lushnjës, por për shkak të gjendjes së rënduar shëndetësore, ai është transportuar me urgjencë drejt Spitalit Universitar të Traumës në Tiranë.
Shërbimet e policisë dhe grupi hetimor ndodhen në vendngjarje. Ata kanë nisur hetimet për të zbardhur rrethanat e plota dhe për të përcaktuar shkaqet që çuan në këtë përplasje.