Një aksident rrugor ka ndodhur pasditen e së shtunës, më 21 shkurt 2026, në dalje drejt superstradës, pranë zonës së Ishull Lezhës.
Një automjet, që lëvizte nga qyteti i Lezhës, u përplas me një motomjet që po drejtohej drejt Lezhës. Automjeti tentoi të futej në rrugën dalëse drejt superstradës, kur ndodhi përplasja. Si pasojë, drejtuesi i motomjetit mbeti i plagosur dhe u transportua me urgjencë në Spitalin Rajonal të Lezhës, ku po merr ndihmën e nevojshme mjekësore.
Shërbimet e policisë kanë mbërritur menjëherë në vendngjarje, kanë kryer veprimet e para procedurale dhe po punojnë për zbardhjen e plotë të rrethanave të ngjarjes. Hetimet vijojnë për të përcaktuar shkaqet e aksidentit.
Sipas të dhënave paraprake, qarkullimi i automjeteve në zonë ka qenë përkohësisht i vështirësuar.