Një aksident me pasojë vdekjen është regjistruar mbrëmjen e së premtes, më 22 maj 2026, në aksin rrugor Lezhë–Kryqëzimi i Rrilës. Sipas njoftimit zyrtar të Policisë, rreth orës 21:10, automjeti i drejtuar nga shtetasi M.P., 23 vjeç, banues në Lezhë, është përplasur me një motomjet që drejtohej nga shtetasi P.M., 36 vjeç, banues në fshatin Barbulloj.
Si pasojë e përplasjes së fortë, 36-vjeçari ka ndërruar jetë në vendngjarje. Pas mbërritjes së shërbimeve të policisë, drejtuesi i automjetit, shtetasi M.P., është shoqëruar në Komisariat për kryerjen e veprimeve të mëtejshme procedurale.
Grupi hetimor ndodhet në vendngjarje dhe po punon për zbardhjen e plotë të rrethanave dhe shkaqeve që çuan në këtë ngjarje tragjike. Për shkak të hetimeve dhe ndërhyrjes së mjeteve të emergjencës, qarkullimi në zonën pranë kryqëzimit të Rrilës ka pasur vështirësi për disa minuta.