Një aksident rrugor u regjistrua mbrëmjen e së shtunës, më 2 maj, rreth orës 22:20, në zonën e Lalmit të Ri në Lezhë. Ngjarja ndodhi në rrugën Nush Radovani, në aksin dytësor Lezhë–Manati, ku një automjet doli nga rruga dhe përfundoi përmbys në kanalin anësor.
Drejtuesi i mjetit, shtetasi T. Gj., rreth 60 vjeç, humbi kontrollin e automjetit. Forcat e Shërbimit të Mbrojtjes nga Zjarri dhe Shpëtimit dhe policia mbërritën menjëherë në vendngjarje dhe e nxorën shoferin nga automjeti i dëmtuar. Ai u transportua në spital për ndihmë mjekësore dhe ndodhet jashtë rrezikut për jetën.
Nga verifikimet e kryera rezulton se në automjet ndodhej vetëm drejtuesi. Ekipet e emergjencës kontrolluan zonën dhe mjetin për të konfirmuar mungesën e personave të tjerë të përfshirë.
Grupi hetimor i policisë vijon punën për zbardhjen e plotë të rrethanave të aksidentit.