Një aksident tragjik me pasojë vdekjen e një personi ka ndodhur gjatë orëve të vona të natës në aksin rrugor Lezhë-Milot, në afërsi të fshatit Markatomaj. Viktima, shtetasi Gëzim Tuci, rreth 50 vjeç, ka ndërruar jetë në vendin e ngjarjes si pasojë e përplasjes nga një automjet.
Sipas informacioneve zyrtare nga Policia e Lezhës, drejtuesi i mjetit, shtetasi Artur Prendi, 42 vjeç, është shoqëruar në ambientet e komisariatit për kryerjen e veprimeve të mëtejshme procedurale. Gjatë hetimeve paraprake, drejtuesi i mjetit iu nënshtrua testimit për praninë e alkoolit, i cili rezultoi negativ (0.00 mg/l).
Në lidhje me shkaqet e ngjarjes, burime hetimore bëjnë me dije se dyshohet që këmbësori ka ndërprerë rrugën në mënyrë të menjëhershme, duke mos i lënë kohë reagimi drejtuesit të automjetit. Automjeti i përfshirë në aksident, një model Ford Kuga, përveç përplasjes me këmbësorin, ka goditur edhe një stendë të tregtimit të produkteve bujqësore që ndodhej në anë të rrugës, në afërsi të zonës së Shënkollit. Grupi hetimor ndodhet në vendngjarje për të dokumentuar të gjitha rrethanat dhe për të zbardhur dinamikën e plotë të këtij incidenti rrugor.