Një aksident i rëndë rrugor ka ndodhur gjatë orëve të para të mëngjesit të së shtunës, më 4 korrik 2026, në aksin rrugor Lezhë-Milot, pranë kryqëzimit të Rriles.
Sipas informacioneve paraprake, shtetasi Preng Ndreka, 66 vjeç, banues në Shënkoll, po udhëtonte me biçikletë kur është goditur nga një automjet tip "Benz" me targa të Kosovës. Si pasojë e përplasjes, 66-vjeçari ka marrë lëndime të rënda. Pas marrjes së ndihmës së parë mjekësore, ai është dërguar me urgjencë në Spitalin e Traumës në Tiranë për një trajtim më të specializuar.
Forcat e Policisë kanë mbërritur në vendngjarje dhe kanë kryer veprimet procedurale. Drejtuesi i automjetit është shoqëruar dhe ndaluar nga autoritetet, të cilat kanë nisur hetimet për të zbardhur rrethanat dhe shkaqet e plota të këtij aksidenti.