Një aksident trafiku me pasoja fatale ka ndodhur këtë të diel në fshatin Veriq të Istogut, ku si pasojë e përplasjes ndërmjet një kamioni dhe një motoçiklete, drejtuesi i kësaj të fundit ka ndërruar jetë.
Zëdhënësi i Policisë së Kosovës për rajonin e Pejës, Fadil Gashi, ka njoftuar se autoritetet janë njoftuar për këtë rast rreth orës 12:17. Menjëherë pas marrjes së njoftimit, në vendin e ngjarjes kanë dalë njësitë përkatëse policore, si dhe ekipet e autoambulancës. Mjeku kujdestar që ka mbërritur në vendin e ngjarjes ka konstatuar vdekjen e personit që drejtonte motoçikletën.
Pas kryerjes së hetimeve paraprake, trupi i pajetë i viktimës është dërguar për procedurat e tjera të parapara me ligj, sipas urdhrit të organeve kompetente. Aktualisht, njësitet e hetimit janë duke punuar për zbardhjen e plotë të rrethanave dhe shkaqeve që çuan deri te ky aksident tragjik.
Përditësime
Policia e Kosovës ka sqaruar detajet lidhur me aksidentin tragjik në fshatin Veriq. Sipas njoftimit zyrtar, ngjarja ka ndodhur të hënën në orën 12:00, duke korrigjuar raportimet e mëparshme që e vendosnin ngjarjen të dielën në orën 12:17.
Policia e Kosovës njoftoi se aksidenti në fshatin Veriq të Istogut ka ndodhur në orën 12:15. Hetimet po udhëhiqen nga Njësiti Rajonal i Komunikacionit Rrugor, ndërsa trupi i viktimës është dërguar për obduksion në Institutin e Mjekësisë Ligjore në Prishtinë.